မင်းပြား ဆန်ဈီး မတန်တဆ မြင့်တက်​

မင်းပြား (သြဂတ် ၄၊ ၂၀၁၅)

        မင်းပြားမြို့နယ်မာ အညာရီနစ်မြုပ်မှုကြောင့် ဆန်ဈီး မတန်တဆ မြင့်တက်လာနီရေလို့ သတင်းရဟိပါရေ။

        မင်းပြားမြို့နယ် ဆန်ဈီးစွာ မင်းပြားမာ အညာရီစလို့ တက်တေ (၂၇-၇-၂၀၁၅) ရက်နိအထိ ပုံမှန် ဆန်ဈီး ပေါ်ဆန်မွှီးဆန်တအိတ်ကို ၃၂၀၀၀ိ/-၊ ရွှေဝါထွန်း ဆန်တအိတ်ကို ၁၆၀၀၀ိ/- ဟိနီစွာက အညာရီကြီးလာရေ (၂၈-၇-၂၀၁၅) ရက်နိကပင် ဆန်ဈီးတက်လာစွာ အညာရီပြန်လို့ ကျလားပြီးနောက်ပိုင်း (၃-၈-၂၀၁၅) ရက်နိမာ ပေါ်ဆန်မွှီး ဆန်တအိတ်ကို ၄၅၀၀၀ိ/-၊ ရွှေဝါထွန်း ဆန်တအိတ်ကို ၃၀၀၀၀ိ/- ဖြစ်ခပါရေ။

       (၄-၈-၂၀၁၅) ရက်နိမာ မင်းပြား ဆန်ဈီးက  ပေါ်ဆန်မွှီးဆန်တအိတ်ကို ၅၀၀၀၀ိ/-၊  ရွှေဝါထွန်း ဆန်တအိတ်ကို ၃၂၀၀၀ိ/- အထိ ဟိနီရေလို့ သိရပါရေ။

          မင်းပြားမာ ဒေဂုပိုင် ဆန်ဈီး မတန်တဆ မြင့်တက်လာပြီးကေ ကိုယ်ဝယ်ချင်ရေ ဆန်ကိုလေ့ လိုသလောက် ဝယ်ယူနိုင်ဖို့ အခက်အခဲဟိနီရေလို့ သိရပါရေ။

        အညာရီနစ်မြုပ်မှုကြောင့် မင်းပြားမြို့နယ် တခုလုံးက ဆန်၊ စပါး အားလုံး ပျက်စီးဆုံးရှုံးလားပြီးကေ လမ်း၊ တန်းထား တိ ကျိုးပျက်နီရေ အတွက် အခြားနီရာက ဆန်တိ အချိန်မီ မရောက်နိုင်လို့ အဂုပိုင် ဈီးနှုန်းမြင့်တက်လာစွာလို့ မင်းပြားမြို့က ဆန်လုပ်ငန်းရှင် တယောက်က ပြောပါရေ။

        မင်းပြား ဆန်ဈီးစွာ နောက်ထပ်လေ့ ဒေဂု နောက်ဆုံးဈီးနှုန်းထက် ပိုလို့ မြင့်တက်လာနိုင်ဖို့ ဟိရေလို့ မင်းပြားမြို့သားတိက သုံးသပ်နီကတ်ပါရေ။

       မင်းပြား ဆန်ဈီးမြင့်တက်မှုကို အစိုးရအဖွဲ့က ဈီးနှုန်းချဖို့ ဆောင်ရွက်ထားကေလေ့ မင်းပြား ဆန်ဈီးနှုန်းက မတန်တဆ မြင့်တက်နီတုန်း ဖြစ်ပါရေ။

       မင်းပြားမြို့နယ်မာ အညာရီ ပြန်လို့ကျလားပြီးနောက်ပိုင်း အဓိက အစားအစာဖြစ်တေ ဆန်ဈီးမြင့်တက်မှုကြောင့် အခြီခံလူတန်းစား အများစု ဒုက္ခရောက်နီကတ်ရပါရေ။

မင်းပြား - သတင်း
  4 - 8 -2015