မင်းပြား (ဇူလိုင် ၂၇၊ ၂၀၁၅)
ရခိုင်ပြည်၊ မင်းပြားမြို့နယ်၊ အထောက်အကူပြု ကော်မတီ နန့် စည်ပင်ကော်မတီရို့က ပြည်သူ့ရေးရာ တာဝန်ခံယူနိုင်မှု ဆွေးနွေးပွဲတရပ်ကို (၂၆-၇-၂၀၁၅) ရက်နိက မင်းပြားမြို့၊ မြို့မတောင်ကျောင်း၊ ဓမ္မာရုံအတွင်းမာ ပြုလုပ်ခရေလို့ သတင်းရဟိပါရေ။
ယင်းဆွေးနွေးပွဲကို တက်လမ်းစီမံကိန်း (OXFAM) က ကူညီပံ့ပိုးပြီးကေ မင်းပြားမြို့နယ် အထောက်အကူပြု ကော်မတီ နန့် စည်ပင်ကော်မတီရို့က ဦးဆောင်ပနာ ပြုလုပ်ခစွာလို့ သိရပါရေ။
ဆွေးနွေးပွဲ ပြုလုပ်ရရေ ရည်ရွယ်ချက်တိက ဆိုပါကေ (၁) ဌာနဆိုင်ရာများ နန့် ပြည်သူများအကြား အပြန်အလှန် နားလည်မှု တည်ဆောက်နိုင်ရန်၊ (၂) ဌာနဆိုင်ရာများဧ့ ပြည်သူ့ဝန်ဆောင်မှု လုပ်ငန်းတိမာ တာဝန်ခံယူနိုင်မှု မြင့်တက်လာစီရန်၊ (၃) ဌာနဆိုင်ရာများ နန့် ပြည်သူများအကြား အပြုသဖော ညှိနှိုင်းဆွေးနွေးမှုနန့် ဒေသအတွင်း ဖြစ်ပေါ်နီရေ ကိစ္စရပ်တိကို ပူးပေါင်း ဖြီရှင်းနိုင်ရန်၊ (၄) ဌာနဆိုင်ရာများနန့် ပြည်သူများကြား အပြုသဖောဆောင်ရေ ညှိနှိုင်းဆွေးနွေးမှုများ ဖြစ်ပေါ်လာစီရန် ဖြစ်ပါရေ။
ယင်းဆွေးနွေးပွဲသို့ မင်းပြားမြို့နယ် မြို့နယ်အုပ်ချုပ်ရေးမှူး၊ ပြည်နယ်လွှတ်တော် ကိုယ်စားလှယ်၊ မြို့နယ် အထောက်အကူပြု ကော်မတီ နန့် စည်ပင်သာယာရေး ကော်မတီ မြို့နယ်ကျေးလက်ဒေသ ဖွံ့ဖြိုးတိုးတက်ရေး ဦးစီးမှူးနန့် ဖိတ်ကြားထားရေ ဌာနဆိုင်ရာ လူကြီးတိ၊ မြို့သူ/သား၊ ရွာသူ/သား စုစုပေါင်း (၁၅၀) လောက် တက်ရောက်ခကတ်တေလို့ သိရပါရေ။
ဒေ ဆွေးနွေးပွဲမာ အဓိက ဆွေးနွေးခကတ်စွာက မင်းပြားမြို့နယ်၊ စည်ပင်သာယာရေး ကော်မတီက မြို့တွင်းလမ်း/ တန်းထား ဆောင်ရွက်ချက်တိ၊ မြို့တွင်း သန့်ရှင်းရေးလုပ်ငန်း ဆောင်ရွက်ထားရှိမှုတိ၊ လိုင်စင်စီနန့် မြို့မဈီး ဆောင်ရွက်ထားဟိမှုတိ၊ လွှတ်တော် ရန်ပုံငွေ ကိစ္စတိ၊ ကျေးလက် လမ်း/ တန်းထား ဆောင်ရွက်ထားဟိမှုတိ၊ မြစိမ်းရောင် စီမံကိန်း ဆောင်ရွက်ထားဟိမှုတိကို သက်ဆိုင်ရေ တာဝန်ဟိ လူကြီးတိက အကြောင်းအရာ တခုချင်းစီ ရှင်းလင်းတင်ပြခကတ်ပြီးကေ တက်ရောက်လာလူတိက အကြောင်းအရာ တခုချင်းစီနန့် ပတ်သက်လို့ စိတ်ကြိုက် မီးခွန်းတိ မီးမြန်းခကတ်ပနာ သက်ဆိုင်ရေ လူကြီးတိက ပြန်လို့ ဖြီကြားပီးခရေလို့ သိရပါရေ။
ဒေပိုင် ဆွေးနွေးပွဲ ပြုလုပ်ရရေအတွက်နန့် ပြည်သူတိက သိချင်၊ မီးချင်ရေ ဌာနဆိုင်ရာ အကြောင်းအရာတိ၊ လုပ်ငန်းတိကို ပွင့်ပွင့်လင်းလင်း မီးကြည့်ခွင့်ရပြီးကေ သက်ဆိုင်ရေ တာဝန်ဟိ လူကြီးတိက ပြန်လို့ဖြီကြားပီးရေ အတွက်ကြောင့် ဌာနဆိုင်ရာတိနန့် ပြည်သူတိအကြား အချင်းချင်း နားလည်မှုရဟိကတ်ပြီးကေ ဒေသအတွင်း ဖြစ်ပေါ်နီရေ တချို့ ကိစ္စရပ်တိကို ပူးပေါင်း ဖြီရှင်းနိုင်ဖို့လို့ ပြည်သူတိက မျှော်လင့်နီကတ်တေလို့ သိရပါရေ။
ဒေပိုင် ဆွေးနွေးပွဲမျိုးကို (၃)လ တခါလောက် ပြုလုပ်ပီးဖို့ အစီအစိုင်ဟိကြောင်း၊ ဒေ ဆွေးနွေးပွဲမာ တက်ရောက်လာရေ ပြည်သူတိက ဒေသအတွင်း ပညာရေး၊ ကျန်းမာရေးနန့် အခြားကိစ္စရပ်တိကိုပါ မီးမြန်းလာရေအတွက်ကြောင့် နောက်ထပ် ဆွေးနွေးပွဲပြုလုပ်ဖြစ်ခကေ ယင်းဌာနတိကိုပါ ဖိတ်ခေါ်ဆွေးနွေးပီးဖို့ဖြစ်ပါကြောင်း၊ ဒေဂု ပြုလုပ်တေ ဆွေးနွေးပွဲ မှတ်တမ်းကို စာအုပ်ပြုလုပ်ပြီးကေ သက်ဆိုင်ရေ ဌာနတိနန့် တက်ရောက်လာရေ ပြည်သူတိကို ပြန်လို့ ပီးအပ်လားဖို့ ဖြစ်ပါကြောင်း၊ ပွဲဖြစ်မြောက်ရေး အတွက် ကမကထ ကူညီဆောင်ရွက်ပီးရေ မင်းပြားမြို့က ကိုသိန်းမောင် က ပြောပါရေ။
ဒေပိုင် ဆွေးနွေးပွဲမျိုးတခုကို ၂၀၁၄ ခုနှစ် နိုဝင်ဘာလ အတွင်းက မင်းပြားမြို့၊ မြို့နယ်ဓမ္မာရုံမာ Citizen Journalist & Online Media (Cj) အဖွဲ့က ပံ့ပိုးကူညီမှုနန့် ပြုလုပ်ခဖူးရေလို့ သိရပါရေ။
မင်းပြား - သတင်း
27 - 7 - 2015
0 comments:
Speak up your mind
Tell us what you're thinking... !