(31-7-2015) ရက်နိ မင်းပြားမြို့ အညာရီ အမြင့်ဆုံးထိရောက်၊ လူ(၁၀)ကျော်သီဆုံး

Written By Mong Bra's News on Saturday, August 1, 2015 | 9:07 AM

မင်းပြား (ဇူလိုင် ၃၁၊ ၂၀၁၅)

#မင်းပြားမြို့အခြေအနေ
""""""""""""""""""""""""
- ဇူလိုင် (၃၁) ရက်နိ မင်းပြား အညာရီစွာ အခြားနိတိထက် အမြင့်ဆုံးသို့ ရောက်ဟိ။

- မင်းပြားမာ အမြင့်ဆုံးလမ်းဖြစ်တေ ကျိန်းတောင်ခြီရင်းက စွန်ရဲလမ်းမာ လူအရပ် ခါးလောက်ရောက်။

- အညာရီ မင်းပြားမြို့ထဲမာ လူအရပ် နစ်မြုပ်၊ လူအရပ် လိုင်လောက်ရောက်။

- မင်းပြားမြို့ထဲ မြီနိမ့်/အိမ်နိမ့်ရေ မိသားစုတိ ဘုန်းကြီးကျောင်းတိမာ ခိုလှုံနီကတ်ရ။

- မြို့ထက် ကျိန်းတောင်ခြီရင်းက ဘုန်းကြီးကျောင်းတိမာ ရီဘေးဒုက္ခသည်တိ ရွီလို့မရအောင် များပြားလာ။

- မင်းပြား လူမှုကူညီရေး ဥက္ကဋ္ဌ ဦးခင်ဇော်ဝင်း ဦးဆောင်ရေ ရီဘေးဒုက္ခသည် ယာယီကူညီရေးအဖွဲ့က ဆီးရုံရှိက ကျောင်းသစ် ဘုန်းကြီးကျောင်းမာ အပင်ပန်းခံလို့ ရီဘေးဒုက္ခသည်တိကို နိုင်သလောက် ထမင်းချက်ကျွေး။

- ချက်ပြုတ်ရေးအဖွဲ့က အင်အားလိုက်မမီလို့ ရီဘေးဒုက္ခသည်အများစု တရက်မာ ထမင်း တနပ်တည်းရာ ဖြစ်တေပိုင် စားကတ်ရ။

- ယာယီ ကူညီရေးအဖွဲ့မာ လူအား/ဖေသာအား လိုက်မမီယာ။ ယေဒါလေ့ ဖြစ်တေနည်းနန့် ဆက်လက်ချက်လို့ကျွေးနီ။

- မြို့နယ်အုပ်ချုပ်ရေးမှူးက ရီဘေးဒုက္ခသည်တိကို အရေးမစိုက်။ ယာယီရီဘေးဒုက္ခသည်စခန်း (ဘုန်းကြီးကျောင်း) တိကို လာလို့ မကြည့်ဖူး။ သတင်းလေ့ လာမမီးဖူး။

#မင်းပြားမြို့နယ်ရွာတိအခြေအနေ
""""""""""""""""""""""""""""""""""
- ဇူလိုင် (၃၁)ရက်နိ မင်းပြားမြို့နယ် မြောက်ပိုင်းက ရွာပေါင်း (၅၀) လောက်က ရွာသားတိ အသက်အန္တရာယ်နန့် ရင်ဆိုင်နီခရ။

- မင်းပြားမြို့နယ်မာ ဘုတ်/လောင်းမြုပ်လို့ လူ (၁၀)ယောက်ထက်မနည်း သီဆုံး။ အလောင်းရစွာရ။ ကျန်ရေ အလောင်းတိကို ရှာနီကတ်တုန်း။

- ရွာတိမာဆိုကေ ပြောဖို့မဟိယာ၊
အိမ်ခေါင်ထက်ကို တက်နီကတ်ရ၊
ဘုန်းကြီးကျောင်း၊ တောင်တိကို ပြီးနီကတ်ရ။

- တောင်မဟိရေ ရွာတိမာ ဘုန်းကြီးကျောင်း တကျောင်းတည်းမာ တရွာသားလုံး တက်နီကတ်ရ။

- အသက်အန္တရာယ်နန့် ရင်ဆိုင်နီရရေ ရွာတိက ယာယီကယ်ဆယ်ရေး အဖွဲ့ကို သူရို့ကို လာကယ်တင်ဖို့ အကူအညီတောင်း။ လူအင်အား / စက်လောင်းအင်အား မဟိလို့ မကူညီနိုင်ခ။

- မင်းပြားမြို့နယ် ပြားချောင်းတောင်ရွာ ဘုန်းကြီးကျောင်းက လူ (၅၀) ကျော်ကိုရာ ယာယီကယ်ဆယ်ရေးအဖွဲ့က စက်လောင်းနန့် ယူဆောင်ပနာ မင်းပြား ရတနာမွန်ဘုန်းကြီးကျောင်းသို့ ပို့ဆောင်နိုင်ခ။

- ရွာတိအားလုံးမာ သောက်/သုံး ရီကန်တိ အညာရီဝင်ရောက်။ သောက်ရီအခက်အခဲဟိ။ ဝမ်းရောဂါဖြစ်ဖို့ စိုးရိမ်ရ။

- ကျွဲနွားတိ သီဆုံး။ စပါးပျိုးပင်တိအားလုံး ပျက်စီး။

- အစားအစာ၊ သောက်/သုံးရီ၊ ကျန်းမာရေး၊ ဆီးဝါး၊ အဝတ်အစား အကူအညီတိ အများကြီးလိုအပ်။

- မင်းပြား မီးစက်ကြီး ရီမြုပ်၊ မီးမရ၊ ဖုန်း ဘေထရီမဖြည့်ရ။

- ဖုန်းလိုင်း/အိန်တာနတ်လိုင်း ပြတ်တောက်။

- သတင်းတိကို အချိန်နန့် တပြေးညီ တင်ပီးနိုင်ဖို့ မလွယ်။

- မင်းပြားမြို့နယ်က ရီဘေးသင့်ပြည်သူတိကို ကူညီချင်ရေဆိုပါကေ ရီဘေးဒုက္ခသည် အရေးပေါ် ကူညီရေးအဖွဲ့က ဦးခင်ဇော်ဝင်း (Ph:09421755893, 09261152229) နန့် ကိုခိုင်ဖိုးထူး (Ph:09259365682) ရို့ကို ဆက်သွယ် မီးကြည့်နိုင်ပါရေ။

မင်းပြား - သတင်း
31 - 7 - 2015