နယ်စပ်ရေးရာဝန်ကြီးဌာန၊ အမြဲတမ်းအတွင်းဝန် ဦးစံရွှေအောင် မင်းပြား ရီဘေးဒုက္ခသည်များထောက်ပံ့ရေးအတွက် နောက်ထပ်ကျပ်သိန်း(၁၀၀)လှူဒါန်း

မင်းပြား (သြဂတ် ၅၊ ၂၀၁၅)

       ရခိုင်ပြည်၊ မင်းပြားမြို့နယ်က ရီဘေးဒုက္ခသည်တိကို ထောက်ပံ့ပီးနိုင်ဖို့အတွက် (၅-၈-၂၀၁၅) ရက်နိကခါ နယ်စပ်ရေးရာဝန်ကြီးဌာန၊ အမြဲတမ်းအတွင်းဝန် ဦးစံရွှေအောင် နန့် ဇနီး ဒေါ်အေးအေးသန်း မိသားစုက နောက်ထပ် ဖေသာ ကျပ်သိန်း (၁၀၀) ပီးအပ် လှူဒါန်း ခရေလို့ သတင်းရဟိပါရေ။

        ဒေချိန်းခေါက် အလှူစွာ မင်းပြားရီဘေးအတွက် တတိယအကြိမ်မြောက် လှူဒါန်းစွာ ဖြစ်ပြီးကေ သူရို့မိသားစုက မင်းပြား ရီဘေးအတွက် စုစုပေါင်း ကျပ်သိန်း (၅၀၀) ကျော် လှူဒါန်းထားပြီးယာလို့ သိရပါရေ။

         ဒေဂု လှူရေ ဖေသာ ကျပ်သိန်း (၁၀၀) စွာ မင်းပြားမြိုနယ်က ရီဘေးဒုက္ခကျရောက်နီရေ ရွာတိအတွက် ထောက်ပံ့ပီးဖို့ ထောက်ပံ့ရေး အဖွဲ့မာ ဆန်အိတ် ပြတ်လပ်နီလို့ ဆန်ဝယ် ထောက်ပံ့ပီးနိုင်ဖို့ ပီးအပ်လှူဒါန်းခစွာလို့ သိရပါရေ။

           ယင်း ဖေသာ ကျပ်သိန်း (၁၀၀) ကို နယ်စပ်ရေးရာဝန်ကြီးဌာန၊ အမြဲတမ်းအတွင်းဝန် ဦးစံရွှေအောင်က ရီဘေးဒုက္ခသည် ထောက်ပံ့ကူညီရေး စခန်း ဖွင့်ထားရေ မင်းပြားမြို့ ဓမ္မိကာရုံ ဘုန်းကြီးကျောင်းမာ ပီးအပ်ခပြီးကေ တာဝန်ဟိ လူကြီးတိက လက်ခံရယူခရေလို့ သိရပါရေ။

        မင်းပြားမြို့နယ်အတွင်း အညာရီမြုပ်လားရေ ရွာတိက သောက်/သုံးရီ ကန်တိထဲက ရီတိကို ရီစုပ်ထုတ်နိုင်ဖို့အတွက် ရီစုပ်စက်တိ ရဟိနိုင်အောင် ဆောင်ရွက်ပီးဖို့ဖြစ်ကြောင်း အမြဲတမ်းအတွင်းဝန် ဦးစံရွှေအောင်က ယင်းနိက အခမ်းအနားမာ ပြောခပါရေ။

      

မင်းပြား - သတင်း
   5 - 8 - 2015