မင်းပြား-ပညာရေးဖောင်ဒေးရှန်းအဖွဲ့က ဦးဆောင်လို့ (၁၀)တန်း ဂုဏ်ထူးရ ကျောင်းသား/သူတိနန့် ဆရာ/မတိကို ထူးချွန်ဆုချီးမြှင့်

မင်းပြား (ဇွန် ၁၉၊ ၂၀၁၅)

        မင်းပြားမြို့၊ ပညာရေးဖောင်ဒေးရှန်းအဖွဲ့က ဦးဆောင်လို့ ၂၀၁၅ ခုနှစ် (၁၀)တန်းကို မင်းပြားမြို့နယ်က ဂုဏ်ထူးနန့် ထူးချွန်အောင်မြင်ကတ်တေ ကျောင်းသား/သူတိနန့် ဂုဏ်ထူးထွက်အောင် သင်ကြားပြသပီးကတ်တေ ဆရာ/မတိကို ထူးချွန်ဆုချီးမြှင့်ရေအခမ်းအနားကို (၁၈-၆-၂၀၁၅) ကြာသားပတီးနိ၊ နိခင်းဖက် (၁) နာရီအချိန်လောက်က မင်းပြားမြို့၊ မြို့နယ်ဓမ္မာရုံကြီးအတွင်းမာ ပြုလုပ်ခရေလို့ သတင်းရဟိပါရေ။

           ယင်းအခမ်းအနားသို့ မြို့နယ်သံဃာ့နာယကဆရာတော် (၉)ပါးအပါအဝင် မင်းပြားမြို့နယ် မြို့နယ်အုပ်ချုပ်ရေးမှူးနန့် ဌာနဆိုင်ရာလူကြီးတိ၊ ဆရာ/မတိနန့် ကျောင်းသား/သူတိ စုစုပေါင်း (၅၀၀) ကျော်လောက် တက်ရောက်ခကတ်တေလို့ သိရပါရေ။

           ဒေပိုင် (၁၀) တန်း ဂုဏ်ထူးရကျောင်းသား/သူတိကို မင်းပြား ပညာရေးဖောင်ဒေးရှန်းအဖွဲ့က ၂၀၁၂ ခုနှစ်ကပင် စတင်လို့ နှစ်စိုင် ထူးချွန်ဆုချီးမြှင့်ခပြီးကေ ဒေနှစ်ခါတော့ ပညာရေးဖောင်ဒေးရှန်းအဖွဲ့က ဦးဆောင်ကြီးမှူးပနာ မင်းပြားမြို့က စေတနာရှင်၊ အလှူရှင်တိပံ့ပိုးမှုနန့် ထူးချွန်ဆုပီးနိုင်ခစွာလို့ သိရပါရေ။

         ၂၀၁၅ ခုနှစ် (၁၀)တန်း စာမီးပွဲမာ မင်းပြားမြို့နယ်က ရဟိရေ ဂုဏ်ထူးရှင်တိက ဆိုပါကေ -
(၄) ဘာသာဂုဏ်ထူးရှင်  = (၁) ယောက်
(၃) ဘာသာဂုဏ်ထူးရှင်  = (၆) ယောက်
(၂) ဘာသာဂုဏ်ထူးရှင်  = (၈) ယောက်
(၁) ဘာသာဂုဏ်ထူးရှင်  = (၃၈) ယောက်
စုစုပေါင်း ဂုဏ်ထူးရှင်     = (၅၃) ယောက် ဖြစ်ပါရေ။

           "(၁၀)တန်းမာ ဂုဏ်ထူးရ ကျောင်းသား/သူတိအတွက်  (၁)ဘာသာကို ဖေသာ ကျပ် (၂)သောင်း နှုန်းအပြင် ဂုဏ်ထူးထွက်အောင် သင်ကြားပြသပီးခရေ ဆရာ/မတိကိုလေ့ ဖေသာ ကျပ် (၂)သောင်းစီ ချီးမြှင့်ပီးနိုင်ခပါရေ။ (၄) ဘာသာဂုဏ်ထူးရှင် တယောက်ကို ကျပ် (၈)သောင်း၊ (၃) ဘာသာဂုဏ်ထူးရှင် တယောက်စီကို ကျပ် (၆)သောင်း၊ (၂) ဘာသာဂုဏ်ထူးရှင် တယောက်စီကို ကျပ် (၄)သောင်း နန့် (၁) ဘာသာဂုဏ်ထူးရှင် တယောက်စီကို ကျပ် (၂)သောင်းစီ ချီးမြှင့်ခစွာ ဖြစ်ပါရေ" လို့ မင်းပြားမြို့ ပညာရေးဖောင်ဒေးရှန်းအဖွဲ့ အတွင်းရေးမှူး(၂) တာဝန်ကိုယူထားရေ ဆရာ ဦးကျော်သာမြ က ပြောပါရေ။

           "မင်းပြားမြို့နယ် ပညာရေးဖောင်ဒေးရှန်းအဖွဲ့က ပညာသင်ထောက်ပံ့ကြေးအဖြစ် ဆီးတက္ကသိုလ် ကျောင်းသား(၁)ယောက်အတွက် (၁)လကို ဖေသာ ကျပ်(၅)သောင်းနှုန်းနန့် အခြားသက်မွီးဝမ်းကျောင်း တက္ကသိုလ်တက်နီကတ်တေ ကျောင်းသား/သူ (၇) ယောက်အတွက် (၁)ယောက်စီကို (၁)လ ဖေသာ ကျပ်(၃)သောင်းနှုန်းစီ လစိုင်ထောက်ပံ့ပီးနီပါရေ" လို့ ဆရာ ဦးကျော်သာမြ က ပြောပါရေ။

         မင်းပြားမြို့ ပညာရေးဖောင်ဒေးရှန်းအဖွဲ့စွာ မင်းပြားမြို့နယ်က  သက်မွီးဝမ်းကျောင်းတက္ကသိုလ် တက်ရောက်နီကတ်တေ ကျောင်းသား/သူတိကို ၂၀၁၂ ခုနှစ်ကပင်စလို့ ပညာသင်ထောက်ပံ့ကြေး ပီးခစွာဖြစ်ပြီးကေ ဒေဂု လက်ဟိမာတော့ သက်မွီးဝမ်းကျောင်းတက္ကသိုလ် တက်ရောက်နီကတ်တေ ကျောင်းသား/သူ (၈) ယောက်ကို လစိုင် ပညာသင် ထောက်ပံ့ကြေးပီးထားရေလို့ သိရပါရေ။

Photo Credit ; ဓာတ်ပုံ အောင်ကြည်(ဆန်းနုယဉ်) (မင်းပြား)

မင်းပြား - သတင်း
19 - 6 - 2015

       

         
        

်