မင်းပြား (ဇွန် ၂၉၊ ၂၀၁၅)
ရခိုင်ပြည်၊ မင်းပြားမြို့မာ အစာအဆိပ်အတောက်ဖြစ်လို့ မိသားစု(၅)ယောက်စလုံး ဆီးရုံတက်ရပနာ (၂)ယောက် သီဆုံးလခရေလို့ သတင်းရဟိပါရေ။
ယင်း အစာအဆိပ်သင့်ဖြစ်ခရေ (၅) ယောက်စွာ မင်းပြားမြို့နယ်၊ တောင်ပို့ကြီးအုပ်စု၊ (ငပယင့်) ငပြီအင်းရွာက ဦးမောင်ကျော်မင်း (၅၁-နှစ်)၊ ဒေါ်အိမ်သာနု (၄၄-နှစ်) နန့် သူရို့ သားသမီးတိဖြစ်တေ မောင်ကျော်ခင်ဦး (၁၃-နှစ်) (၇-တန်း)၊ မခိုင်ဖြူချေ (၉-နှစ်) (၃-တန်း)၊
မမေချေ (၇-နှစ်) (ဝ-တန်း) ရို့ဖြစ်တေလို့ သိရပါရေ။
"(၂၆-၆-၂၀၁၅) သောက်ကြာနိ ကျိန်းတောင်တန်းက ရှာလို့ရလာရေ ဂရင်မှို၊ တောင်ပုတ်မှိုရောက်မ၊ ရီကြိုင်မှိုတိအပါအဝင် ကဏန်း၊ သဗြုသီး၊ အနောက်ငါး စရေ အစာတိကို ယင်းနိ ညဇာဖက်ထမင်းနန့် သူရို့ မိသားစု (၅)ယောက်စလုံး စားခကတ်ပါရေ။ စနီနိ တရက်လုံးတခုလေ့ မဖြစ်ခပါ။ စနီနိညည့်ခါဖက်ကစလို့ သမီး မခိုင်ဖြူချေ စလို့အန်ပါရေ။ နောက် ဆက်တိုက် သမီး မမေချေက အန်ပနာ သတိမရရေအတွက်နန့် ရွာက ကျန်းမာရေးဆရာမက အရေးပေါ် ဆီးသွင်းပနာ ညည့်ချင်း ဆီးရုံတက်ဖို့ခိုင်းလို့ (၂၈-၆-၂၀၁၅) တလင်းဂနီနိ မိုးလင်းအာရုံ (၅း၃၅) နာရီအချိန်မာ မင်းပြားမြို့၊ ပြည်သူ့ဆီးရုံမာ ဆီးကုသမှုခံခပါရေ။
ရွာမာ ကျန်ခရေ ကျန်မိသားစု (၄)ယောက်လေ့ အန်ပနာ သတိမရ ဖြစ်ဖို့လိုက်လာလို့ ချက်ချင်း ဆီးရုံသို့ ယူဆောင်ပနာ ယင်းနိ (တလင်းဂနီနိ) မိုးထ (၇း၃၀) အချိန်မာ အတွင်းလူနာအဖြစ် ဆီးကုသမှု ခံယူခကတ်ပါရေ။ ဆီးရုံက ဆရာဝန်တိက ဆီးကုသမှုလုပ်ပီးခကေလေ့ အစာအဆိပ်တိက ခန္ဓာကိုယ်တလုံးကို ပြန့်လားခလို့ (၉-နှစ်) သမီး မခိုင်ဖြူချေစွာ ယင်းနိ(တလင်းဂနီနိ)ပင် မင်းပြားမြို့၊ ပြည်သူ့ဆီးရုံကြီးမာ ဆီးကုသမှုခံယင်း သီဆုံးလခပါရေ။ ယင်းအတွက်နန့် သူ့ကို ယင်းနိ ညဇာဖက်သား ချက်ချင်း မင်းပြားသင်္ချိုင်းမာ သင်္ဂြိုလ် လိုက်ရပါရေ။
(၇-နှစ်) သမီးချေ မမေချေ လေ့သင့် ဆီးရုံမာ ဆီးကုသမှုခံနီယင်း ယင်းနိ ညည့်ခါဖက် (၈း၀၀) နာရီအချိန် သီဆုံးလခပါရေ။ သူ့ကိုတော့ (၂၈-၆-၂၀၁၅) တလင်းလာနိ၊ နိခင်းဖက် (၁) နာရီမာ မင်းပြား သင်္ချိုင်းမာ သင်္ဂြိုလ်ခီရပါရေ။ နာရေးကိစ္စကိုတော့ မိသားစု၊ အမျိုးတိနန့်တတူ မင်းပြားမြို့၊ နာရေးကူညီမှုဖောင်ဒေးရှန်းက ကူညီဆောင်ရွက်ပီးပါရေ။
ကျန်လိုက်တေ အမိအဖနန့် သူရို့အကို ရို့ကတော့ အဂုအချိန်မာ သတိရလို့ စကေချေ မြန်းနီကတ်ပါယာ။" လို့ ဒေမိသားစု ကျန်းမာရေးကိစ္စကို တာဝန်ခံ ဆောင်ရွက်ပီးနီရေ၊ သူရို့အမျိုး ဒေါ်စံဝင်းခိုင်က စိတ်မကောင်းစွာနန့် ပြောပြပါရေ။
"အစာအဆိပ်အတောက်ဖြစ်စွာကို အချိန်မီကုသနိုင်ခကေ အသက်ရှင်ပါရေ။ ယှင်းယှင်းပြောရကေ သီစရာအကြောင်း မဟိ။ ဆီးရုံကို ရောက်လာခါက (၃)ရက်လောက် ဟိနီယာ။ မှိုမာပါရေ အဆိပ်အတောက်တိက အားလုံး ပြန့်လခရေ။ ဆရာကြီးရို့က အတတ်နိုင်ဆုံး ဆီးကုသပီးခကေလေ့ သမီးချေ (၂)ယောက်ကို မကယ်နိုင်ခ။ ကျန်ရေ (၃)ယောက်ကတော့ ခံနိုင်ရည်ဟိနီလို့ သူရို့အသက်ကို ကယ်တင်နိုင်ခရေ။ ယင်းချင့်တောင် သူရို့ကို ရွာက ကျန်းမာရေးဆရာမ ဆီးရုံတက်ဖို့ အားဓမ္ဓလွှတ်လို့ ရောက်လာစွာ။
အဂုအချိန်မာတော့ အသက်ရှင် ကျန်လိုက်တေ (၃)ယောက်ကတော့ ကျန်းမာရေးကောင်းရေ အနီအထားကိုရောက်နီယာလို့ အကြမ်းဖျင်း ပြောလို့ရရေ။ လူနာတိ မိသားစုဆန္ဒအရ (၃၀-၆-၂၀၁၅) နက်ဖြန် အင်္ဂါနိ မိုးထစောစောခါ ယင်းလူနာ (၃)ယောက်ကို စစ်တွေ ဆီးရုံကြီးသို့ လွှဲပြောင်းပီးဖို့ လုပ်ထားရေ။" လို့ မင်းပြားမြို့နယ်၊ မြို့နယ်ကုသရေးဦးစီးဌာနမှူး ဒေါက်တာ လှထွန်းဇော်က ပြောပါရေ။
မင်းပြား - သတင်း
29 - 6 - 2015
